ज्वरो आएका बिरामीलाई लुम्बिनी मेडिकल कलेजले एम्बुलेन्सबाटै फर्कायो

पाल्पाको लुम्बिनी मेडिकल कलेजले ज्वरो आएका बिरामीलाई एम्बुलेन्समै सोधपुछ गरी फर्काइदिएको छ । बगनासकाली गाउँपालिका २ पोखराथोकका २० वर्षीय दामोदर कुमाललाई कलेजले घरमै आइसोलेसनमा बस्न सुझाउँदै फर्कादिएको हो ।

उनी भारतको मुम्बईबाट गोरखपुर-सुनवल-बुटवल हुँदै पोखरा जाने नाइट बसमा ९ चैत्रमा घर आएका थिए । यस्ता बिरामीलाई मेडिकल कलेजले आइसोलेसनमा राखेर उपचार गर्नुपर्नेमा घरमा पढाएकोमा सरोकारवालाहरुले दुःख व्यक्त गरेका छन् । 

मेडिकल कलेजका निर्देशकले भने बिरामी चेक गरेर औषधिसहित पठाएको बताए । उनले भने, ‘परिस्थिति त्यस्तै परेर होला एम्बुलेन्सबाट फर्काएको । तर, मलाई  त्यसो गरिएजस्तो लाग्दैन, डा. पुजन ड्यूटीमा हुनुहुन्थ्यो । अहिले उहाँसँग मेराे सम्पर्क भएको छैन ।’

बिरामीलाई एउटी नर्सले टाढैबाट एम्बुलेन्समै हेरर उनकी आमासँग औषधि पठाइदिएको एम्बुलेन्स चालक नारायण जिसीले बताए । उनले भने,‘बिरामीले पिसाब लागेर एम्बुलेन्सबाट झर्छु भन्दापनि बाटोमा गएर गरे हुन्छ भन्दै अस्पतालबाट फर्काइदिए ।’

बिरामीको अवस्थाबारे गाउँपालिकाका स्वास्थ्यकर्मीले तानसेनस्थित युनाइटेड मिसन अस्पताललाई जानकारी गराएका थिए । अस्पतालले ‘यहाँ ल्याउने हैन, हामी हेर्दैनाैं’ भन्ने अभिव्यक्ति दिएपछि, मेडिकल कलेज पठाइएको बगनासकाली गाउँपालिकाका स्वास्थ्य संयोजक मनिराम अधिकारीले बताए । उनले भने, ‘ठूला अस्पतालले यसाे गरेपछि अब बिरामीले कसरी उपचार पाउने ?’ 

बिरामीलाई एम्बुलेन्सबाटै फर्काइएको घटनाप्रति प्रमुख जिल्ला अधिकारी यादव सुवेदीले गम्भीर ध्यानाकर्षण भएको बताए । उनले भने, ‘हामीले शनिबार दिउँसो अनुगमन गरेका थियौँ तर बेलुका यस्तो गरेछन् । यसरी बिरामीलाई उपचारै नगरी फर्काउने छुट कसैलाई छैन ।’