आयोजकले जित्यो पहिलो यू–१९ द्विदिवसीय क्रिकेट

नेपालमा पहिलोपटक आयोजित यू–१९ द्विदिवसीय क्रिकेट प्रतियोगिताको उपाधि आयोजक ग्रेट हिमालयन क्रिकेट एकेडेमीले जितेको छ । सोमबार काठमाडौं क्रिकेट ट्रेनिङ सेन्टर (केसिटिसी)लाई एक विकेटले पराजित गर्दै ग्रेट हिमालयनले उपाधि जितेको हो । उपाधिसँगै ग्रेट हिमालयनले एक लाख ५० हजार प्राप्त गरेको छ । केसिटिसीले ७५ हजारमै चित्त बुझायो । 

प्रतियोगिताको फाइनल खेल बलरको खेल बन्यो । केसिटिसीलाई दुवै इनिङ्समा सामान्य योगफलमा रोक्न ग्रेट हिमालयनका आरियो पौडेलले सात विकेट लिए । राशिद खानले ६ विकेट लिए । सोनु देवकोटाको नाममा तीन विकेट रह्यो । केसिटिसीका तिलक भण्डारीले पनि नौ विकेट र सूर्य तामाङले सात विकेट लिए । यद्यपि, उनीहरूको प्रदर्शन टोलीलाई जित दिलाउन पर्याप्त बनेन । बलरहरूसामु यो खेलमा दुवै टोलीका ब्याट्सम्यान चल्न सकेनन् ।

आयुषले ग्रेट हिमालयनका लागि दोस्रो इनिङ्समा जोडेको २४ रन नै यो खेलमा कुनै पनि खेलाडीले जोडेको व्यक्तिगत सर्वाधिक रन बन्यो । प्रतियोगिता अवधिभर उत्कृष्ट प्रदर्शन गरेका केसिटिसीका सूर्य सर्वाेत्कृष्ट खेलाडी घोषित भए । यस्तै, ग्रेट हिमालयनका मोहम्मद आशिफ शेख उत्कृष्ट ब्याट्सम्यान र केसिटिसीका तिलक भण्डारी उत्कृष्ट बलर घोषित भए । यी दुवै खेलाडीले समान १० हजार प्राप्त गरे । ग्रेट हिमालयनका अरियो पौडेल उदयीमान खेलाडी घोषित भए । ग्रेट हिमालयन क्रिकेट एकेडेमीले आयोजना गरेको यू–१९ द्विदिवसीय क्रिकेटमा काठमाडौंका ६ टोलीको सहभागिता रहेको थियो । तीन–तीन टोलीलाई दुई समूहमा विभाजन गरी सञ्चालन गरिएको प्रतियोगितामा समूह विजेता एक–एक टोलीले सीधै फाइनलमा प्रतिस्पर्धा गरेका थिए ।