विश्वकप फुटबलका छनोट खेल स्थगित गर्ने फिफाको निर्णय

फुटबलको सर्वोच्च निकाय अन्तर्राष्ट्रिय फुटबल महासंघ(फिफा)ले विश्वकप फुटबल २०२२ को छनोट खेलहरु स्थगित गरेको छ । एशियाली फुटबल महासंघ र सदस्य राष्ट्रहरुसँगको समन्वयमा फिफाले विश्वकप फुटबलको छनोट खेलहरु स्थगित गरेको जनाएको छ ।
फिफाले मङ्गलबार एक वक्तब्य जारी गरी मार्च २३ देखि ३१ र जुन १ देखि ९ सम्मका लागि निर्धारित खेल तात्कालका लागि स्थगित गरिएको जनाएको छ । कोरोना भाइरसको संक्रमण फैल्ने जोखिममा उक्त छनोट खेल स्थगित गरिएको फिफाले जनाएको छ । स्थगित गरिएको खेलको पुर्नतालिका सम्बन्धमा फिफाले एशियाली महासंघ र सदस्य राष्ट्रहरुसँगको समन्वयमा अर्को मीति तोक्ने जनाइएको छ ।

खेलमा सहभागी प्रत्येक व्यक्तिको स्वास्थ्यलाई ध्यानमा राखेर फिफा र एशियाली महासंघले छनोट खेलको पुर्नतालिका गर्ने एशियाली महासंघले जनाएको छ । यसअघि फिफाले छनोट खेल स्थगित गर्ने सम्बन्धमा सदस्य राष्ट्रहरु समक्ष औपचारिक प्रस्ताव पठाएको थियो ।
नेपालले घरेलु मैदानमा चाइनिज ताइपेइसँग चैत्त १३ गते र अष्ट्रेलियासँग चैत्त १८ गते दशरथ रङगशालामा छनोट खेल्ने पूर्वतालिका रहेको थियो । त्यसैगरी, जुन महिनामा जोर्डनसँग स्पर्धा गर्ने तय गरिएको छ ।

नेपालले यसअघि विश्वकप छनोट खेलमा कुवेतसँग ७–० ले हारेको थियो । चाइनिज ताइपेइलाई २–० ले हराएको नेपालले अष्ट्रेलियासँग ५–० र जोर्डनसँग ३–० ले हार बेहोरेको थियो । घरेलु मैदान दशरथ रङ्गशाला तयार नहुँदा खेल्न सम्भव नभएपछि नेपालले भुटानमा कुवेतसँग १–० ले हार बेहोरेको थियो ।