सेल्फी किङको लुक्समा विपिन

पात्र संवाद  म आफ्नो भूमिकालाई जहिल्यै विशेष ध्यान दिन्छु । कस्तो भूमिका गर्दा सफल हुन्छु भन्नेमा सचेत रहन्छु । र, जहिल्यै पहिलेको भन्दा फरक भूमिका होस् भन्ने चाहन्छु । विविधता खोज्ने भएकाले केही फिल्म छानेर खेल्नुपरेको छ । त्यसरी नै छानिएको फिल्म हो, ‘सेल्फी किङ’ । मैले निर्वाह गरेका ‘भस्मे डन’, ‘विन्दु’, ‘फणिन्द्र प्रसाद’, ‘हरि’जस्ता भूमिका अलग–अलग प्रकृतिका थिए ।   २४ माघमा प्रदर्शनमा आउन लागेको फिल्म ‘सेल्फी किङ’मा पनि त्यस्तै फरक पात्र छ । टेलिभिजनमा कमेडी गर्ने कमेडियनको भूमिका निर्वाह गरेको छु, यस फिल्ममा । त्यस पात्रले कमेडीमा जम्न अनेक संघर्ष गर्छ । अरूलाई हँसाउने कलाकारले निजी जीवनमा कति संघर्ष गर्नुपर्छ भन्ने विषयले मलाई छोएको थियो । त्यही भूमिका निर्वाह गर्न पाउँदा मलाई खुसी लागेको थियो । फिल्म ‘सेल्फी किङ’ ड्रामा प्लस कमेडी जानरामा बनेको छ, जसमा मेरो भूमिकाले दर्शकको मन जित्नेमा ढुक्क छु ।